Ментарынг

Social Camp – гэта бяспечная прастора для абмену досведам і экспертнай падтрымкі. Мы хочам, каб ваш энтузіязм не згасаў і знаходзіліся новыя крыніцы натхнення. Ментарынг быў прыдуманы дзеля таго, каб дапамагчы вам ва ўсебаковым развіцці: прафесійным і асабістым.

Што такое ментарынг?

Ментарынг – гэта працэс сістэмнай і кваліфікаванай падтрымкі, якая прадастаўляецца па запыце таму / той, хто валодае меншым прафесійным вопытам у абранай сферы або стаіць перад няпростым выбарам.

Ментар_ка можа даць параду, кіруючыся сваім прафесійным досведам і з улікам тых выклікаў, якія стаяць перад менці. Задача ментар_кі – дапамагчы менці раскрыць кампетэнцыі і пераадолець сумневы, падтрымаць рух да абранай мэты і ўмацаваць веру ў сябе. Ментар_кі могуць дапамагаць менці, распавядаючы пра ўласны досвед, кейсы і мадэлі дзеяння ў вызначаных сітуацыях, а таксама праз падтрымку, зваротную сувязь і сумесны пошук рашэнняў праблем.

Галоўным чынам, усё пачынаецца з матывацыі. Вы пішаце нам праз кантактную форму на гэтым сайце (адмысловая кнопка – ніжэй), распавядаеце крыху пра сябе і свой прафесійны/навучальны досвед, а таксама пра тое, што вы спадзяецеся атрымаць у рамках праграмы ментарынгу. Магчыма, вы ўжо ведаеце, з кім менавіта з пула нашых ментараў і ментарак хацелі б папрацаваць. Калі вы можаце прапанаваць іншых экспертаў і экспертак, чый досвед і веды будуць вам асабліва карысныя, абавязкова напішыце нам пра гэта!

Пасля апрацоўкі вашай анкеты з вамі звяжацца прадстаўні_ца каманды Social Camp і запрапануе кандыдат_ку на ролю ментар_кі, а таксама час для магчымай pre-match сустрэчы. Калі вы зразумееце, што эксперт ці экспертка – менавіта той/тая, хто вам зараз патрэбен, пачнецца праца ў фармаце рэгулярных сустрэчаў (афлайн і/або анлайн).

Фармат ментарынгу можа змяняцца ў залежнасці ад запыту менці: дэталі будуць агаворвацца ў індывідуальным парадку.

Для беларусаў і беларусак, зацікаўленых у развіцці сваёй краіны. Вы можаце быць студэнт_кай альбо выпускні_цай беларускага ці нават замежнага універсітэту, мець вялікі досвед валанцёрства і грамадскага актывізму або амаль не мець яго – галоўнае, каб у вас была ясная матывацыя ісці наперад. Праграма ментарынгу, як і ўвесь праект Social Camp, створана для прадстаўні_ц беларускай супольнасці па ўсім свеце, таму да ўдзелу мы запрашаем матываваных удзельнікаў і удзельніц з ідэямі, якія далей будуць развіваць наша грамадства.

У чым могуць дапамагчы нашы ментары і ментаркі?

У пошуку рашэнняў грамадска значных праблем
У рэалізацыі сацыякультурных праектаў
У атрыманні ведаў аб спецыфіцы прафесійнага асяроддзя ў новай краіне знаходжання
У прафесійным развіцці
У пашырэнні кантактаў у лакальнай прафесійнай супольнасці і інш.

Менці

Мы адбярэм удзельнікаў і ўдзельніц праграмы на аснове інфармацыі, прадстаўленай у анкеце: матывацыі, запыту, досведу грамадскай актыўнасці і г.д.

Менці змогуць удзельнічаць не толькі ў праграме ментарынгу, але і ў адукацыйнай праграме, а таксама прыняць удзел у конкурсе на атрыманне мінігрантаў для рэалізацыі свайго праекта.

Ментары і ментаркі

Нашы ментары і ментаркі – гэта беларусы і беларускі, якія жывуць у Беларусі і за яе межамі, а таксама замежныя грамадзяне, якія валодаюць экспертызай і відавочнымі дасягненнямі ў канкрэтнай сферы дзейнасці і гатовыя дзяліцца сваім вопытам з менці.

Роля ментараў і ментарак – падтрымліваць менці ў дасягненні іх мэтаў, дзяліцца сваімі ведамі, досведам і кантактамі. Наша праграма аб'ядноўвае тых, хто гатовы дапамагаць, з тымі, каму патрэбная дапамога.