Мінігрантынг: дзесяць праектаў падтрыманыя

Social Camp прапануе ўдзельні_цам адукацыйных праекту і праграмы ментарынгу магчымасць атрымаць экспертную і фінансавую падтрымку уласных праектаў, накіраваных на развіццё лакальных беларускіх супольнасцяў. У ліпені гэтага года мы атрымалі 27 заявак, якія камісія ўважліва ацаніла і ў выніку абрала дзесяць фіналістаў. Кожная каманда ўжо распачала рэалізацыю свайго праекта. Пра што яны?

Папулярызацыя беларускай мовы, гісторыі і культуры сярод дзетак і дарослых з ліку дыяспары ва Ўроцлаве праз стварэнне грамадска-культурніцкай прасторы, медыйна-адукацыйны праект для практыкаў мастацтва – дзеля павялічэння іх бачнасці і далейшага развіцця беларускага мастацкага поля, анлайн-школа лідарства для беларусак – вось толькі частка тых ідэй, якія атрымалі падтрымку. Што цікава і важна, частка праектных заявак датычыла тэмы псіхічнага здароў’я – Social Camp падтрымаў два праекты па тэме, а таксама ідэю правядзення афлайн-мерапрыемстваў на тэму супрацьдзеяння хатняму гвалту – яны адбудуцца ў Польшчы.

Акрамя таго, сярод нашых фіналістаў ёсць каманды, што запланавалі стварэнне ўласных адукацыйных праектаў, абапіраючыся на досвед удзелу ў Social Camp. Для нас гэта вялікі гонар!

Сярод падтрыманых праектаў ёсць і такія, што цалкам адбудуцца ў Беларусі – як у афлайне, так і, зразумела, анлайн. Больш інфармацыі пра праекты з’явіцца на нашым сайце цягам наступных месяцаў.

Зазначаем, што калі ў вас ёсць жаданне далучыцца да Social Camp і паўдзельнічаць у наступным конкурсе праектаў, гэта ўсё яшчэ магчыма. Падрабязнасці – на старонцы Падтрымка праектаў.