Першы набор курсаў адзначыў "медыум"

Чаго гэта мы раптам? Ды проста не паспелі мы азірнуцца, як прайшлі 2,5 месяцы са старту адукацыйнай праграмы Social Camp і мы даімчалі роўна да сярэдзіны нашага першага навучальнага сезона!

Часу дарма мы не гублялі:

• Удзельнікі і ўдзельніцы курса “Крытычнае мысленне, аргументацыя і дэбаты” не толькі “падкачаліся” ў сваёй пераканаўчасці, аргументаванасці і іншых рытарычных навыках, але і маглі пераправерыць свае скілы самастойнай працы падчас навучання на курсе для самастойнага праходжання на платформе мудл.
• Маладыя і прасунутыя грамадскія актывісты і актывісткі адвялі душу на курсе “Распакоўваем актывізм”, сустракаючыся з аднадумцамі і плануючы новыя праекты на карысць Беларусі і беларусам.
• На курсе “Сацыяльная экалогія” не было недахопу ў займальных размовах на тэму ўзаемасувязі экалагічнага крызісу і сацыяльных праблем, а ў канцы навучання ўдзельніцы і ўдзельнікі курса ўразілі сваімі глыбокімі ідэямі будучых сацыяльна-экалагічных праектаў.
• Пра годнасць, салідарнасць і справядлівасць дыскутавалі на курсе “Ад салідарнасці да справядлівага грамадства”. У ход ішоў і ўласны досвед, і старанна і клапатліва падабраныя філасофскія тэксты.
• “Маральныя дылемы 21-га стагоддзя” і “Адвакатаванне” — яшчэ два курсы, на якіх праца кіпіць прама цяпер.

Вельмі чакаем фідбэка ад нашых студэнтак і студэнтаў. Для гэтага па заканчэнні ўсіх курсаў мы правядзем добраахвотнае і ананімнае апытанне нашых абсальвэнтаў і абсальвэнтак і абавязкова падзелімся вынікамі. А ўжо восенню 2023 года будзе аб'яўлены набор на другі навучальны сезон для ўсіх жадаючых, і наша захапляльнае падарожжа паўторыцца — толькі ўжо з новымі поспехамі і новымі выклікамі.

А вось куды ў нас запіс застаецца адкрытым увесь час, гэта на ментарынг! Навінамі аб тым, як ідзе ментарынгавая праграма, мы падзелімся тут крыху пазней. А пакуль запрашаем вас пісаць нам на Socialcamp-Belarus@goethe.de, калі ў вас ёсць запыт на прафесійную падтрымку нашых ментараў і ментарак.

Застаемся на сувязі!