Чаму ў Social Camp такая айдэнтыка?

Мы падумалі, што такое пытанне можа ўзнікнуць падчас знаёмства з нашым праектам. І таму папрасілі дызайнерку праекта падрабязней распавесці пра натхненне і канцэпцыю. Вось што яна адказала:

”У аснове дызайну – форма кола і пластыка беларускіх арнаментаў.

Кола – традыцыйны і шматзначны для беларускай культуры сімвал, адсылае да народнага свята Івана Купалы (Купалле), аб'яднання людзей вакол агульнай ідэі, вакол вогнішча на лецішчы. Беларусы вельмі любяць бавіць час сярод сяброў каля агню! У той жа час круглая форма сімвалізуе рух наперад, развіццё, задае рытм.

Абрыс чырвонай стрэлкі – гэта даніна павагі беларускай традыцыйнай візуальнай культуры, пластыцы беларускіх арнаментаў, у аснове якіх часта ляжаць формы ромбаў, квадратаў і ліній, якія перасякаюцца.

Чырвоная стрэлка ўбудоўваецца ў сістэму – цэласную форму кола – і становіцца яе паўнавартаснай часткай. Адна з галоўных задач нашага праекта – гэта стварэнне прасторы для ўзаемадапамогі, натхнення, камфортнай камунікацыі сярод беларусаў і беларусак у краіне і за яе межамі. Так і тут: стрэлка імкнецца да агульнага, каб узмацніць дзеянне адно аднаго, узаемны рух наперад.

Тры асноўныя колеры, якія задзейнічаныя ў дызайне, – гэта чырвоны, чорны і бэжавае адценне лёну. Яны найбольш часта выкарыстоўваюцца ў традыцыйным беларускім прыкладным дызайне, таму свой выбар я спыніла на іх”.