Сацыяльная экалогія

Сацыяльная экалогія ўяўляе сабой падыход, паводле якога “грамадства” і “прырода” не адлучаюцца адзін ад аднаго пры аналізе розных вызванняў. Наадварот, у гэтай парадыгме прынята разглядаць планету Зямля як сістэму, якая ўключае нежывыя прыродныя сутнасці, жывёлаў, людзей, усё створанае людзьмі, у тым ліку прамысловыя комплексы, палітычныя і эканамічныя адносіны, мастацтва, інтэрнэт і іншыя невідавочныя і цяжкаўлоўныя сімвалічныя формы адносін і практык.

Гэтыя перадумовы дазваляюць знайсці сувязь паміж сацыяльнымі праблемамі (сацыяльнай няроўнасцю, экалагічнай несправядлівасцю, дыскрымінацыяй розных групаў) і экалагічным крызісам, і, адпаведна, падштурхоўваюць шукаць шляхі іх вырашэння, грунтуючыся на прызнанні каштоўнасці сацыяльнай і экалагічнай справядлівасці.

Сацыяльная экалогія прапануе нам прыняць за пункт адліку неіерархічнасць узаемадзеянняў у комплексе прырода/грамадства. Людзі не могуць прысвоіць толькі сабе "суб'ектнасць", актыўнасць, а ўсяму астатняму – рэактыўнасць і аб'ектнасць.

Як мы пераканаліся ў 2020 годзе, магутнымі дзеючымі сіламі могуць быць нават вірусы, а значыцца, думаючы аб грамадскім, мы заўсёды павінны падключаць і аналіз узаемных уплываў паміж людзьмі і мноствам прыродных сілаў і сутнасцяў. Менавіта гэтыя пытанні знаходзяцца ў фокусе курса "Сацыяльная экалогія: этыка і палітыка асяроддзя пражывання".

Студэнты і студэнткі курсу пазнаёмяцца з разнастайнымі сучаснымі тэорыямі, прысвечанымі розным аспектам адносін у рамках “сацыяпрыроднага ансамбля”. А таксама атрымаюць уяўленне аб тым, як прымяняць гэтыя падыходы ва ўласных творчых, даследчых і валанцёрскіх праектах.

Курс дапаможа прымяніць новае бачанне сацыяльна-прыроднага ансамбля да фармулявання асабістага ўнёску (праект/ мастацкае выказванне/ змены ў паўсядзённых практыках і г.д.) у больш справядлівае прыродна-грамадскае жыццё.

На курсе вы зможаце:

• пазнаёміцца з спектрам ідэй і канцэпцый, якія разглядаюць грамадства і прыроду ва ўзаемадзеянні;
• навучыцеся знаходзіць, аналізаваць сацыяльна-прыродныя з’явы ў сваім асяроддзі;
• папрактыкавацца ў мысленні і дыскутаванні пра злучэнне сацыяльнага і экалагічнага, а таксама апрацоўваць ідэі і праекты, што арыентуюцца на пазітыўныя змены ў сацыяльна-экалагічным напрамку.