Ментарынг: што новага чуваць?

За амаль два гады працы праекта Social Camp мы правялі тры адкрытыя наборы на ментарынг – праграму, якая прадугледжвае максімальна індывідуальны падыход да чаканняў і запытаў удзельнікаў і ўдзельніц. Амаль восемдзесят беларусаў і беларусак атрымалі магчымасць папрацаваць з ментарам ці ментаркай на працягу некалькіх месяцаў.

Пары «менці-ментар_ка» сустракаюцца ў зручным для іх фармаце: часцей за ўсё анлайн, але ёсць і такія дуэты, якія працуюць афлайн. Як правіла, гэта сустрэчы з загадзя агаворанымі задачамі раз на два тыдні. Такі рытм дазваляе менці выконваць заданні і пакідае час на рэфлексію. Ментар_ка дае падтрымку, падказвае, дапамагае ў фармуляванні наступных крокаў і задач. Адным словам, гэты чалавек побач, калі неабходны дапамога і падказка.

Вось як ментарынг каментуюць самі менці:

«Ментарка зразумела і па парадку тлумачыла этапы працы. Ведала, куды накіраваць, дзе шукаць далейшыя адказы. Дзякуючы атрыманым ведам ёсць над чым задумацца, і зразумела, што рабіць». 

«Усе нашыя сесіі былі накіраваныя на вынік, кожная праходзіла з фокусам на задачу, якую паставілі на папярэдняй сесіі. Спадабаліся і падыход, і стаўленне: Дар'я дзялілася і кантактамі, і ідэямі, зыходзячы са свайго досведу. Такі досвед ментарства для мяне быў значным. Акрамя таго, падыход Дар'і вельмі падтрымліваючы і гарызантальны: гэта значыць, што няма адчування, што цябе душаць экспертызай, а гэта таксама вельмі вялікі плюс».

«У цэлым праграма апынулася вельмі карыснай з розных бакоў, а Антаніна – выдатнай ментаркай [...] Я для сябе вызначыла гэты фармат працы як адзін з самых удалых, таму што я і адкрыла для сябе шмат новага, і занялася распрацоўкай праекта, на які не хапала смеласці і сіл, і атрымала падтрымку. І ўсё гэта адбывалася ў вельмі спакойнай і сяброўскай атмасферы. Эмоцый больш, чым слоў, якія могуць усё гэта сабраць разам! :)»

Мы імкнемся да таго, каб менці атрымалі не толькі веды і новы досвед, але і матывацыю да дзеяння. А таксама і ў першую чаргу – новыя кантакты ў прафесійнай сферы, упэўненасць у сабе і разуменне каштоўнасці таго, што яны робяць.

У бліжэйшы час наша каманда засяродзіцца на працы з ужо набранымі ўдзельні_цамі. Тым не менш, мы спадзяёмся працягнуць праграму яшчэ сёлета, пра што абавязкова паведамім на нашым сайце.

Застаемся на сувязі!
Каманда Social Camp